रणनीतिकदृष्ट्या जगातील सर्वात संवेदनशील जलमार्ग मानल्या जाणाऱ्या ‘होर्मुज सामुद्रधुनी’वर अमेरिका आणि इराणमधील लष्करी संघर्ष आता विकोपाला गेला आहे. अमेरिकेचे शक्तीशाली ‘अपाचे’ लढाऊ हेलिकॉप्टर पाडल्याचा सूड उगवत अमेरिकेने इराणच्या मुख्य भूमीवर आणि बेटांवर भीषण हवाई हल्ले केले आहेत.

या कारवाईनंतर अमेरिकन लष्कराच्या सेंट्रल कमांडने अधिकृत निवेदन प्रसिद्ध करत “आमचे मिशन यशस्वीरीत्या पूर्ण झाले आहे,” अशी मोठी घोषणा केली आहे. अमेरिकेने हे हल्ले पूर्णपणे ‘सेल्फ डिफेन्स’ म्हणजेच आत्मसंरक्षणासाठी केल्याचा दावा केला आहे.

इराणच्या ‘या’ ३ प्रमुख तळांवर अमेरिकेचे हल्ले

अमेरिकन वायुसेना आणि नौदलाच्या लढाऊ विमानांनी इराणच्या ताब्यातील अत्यंत महत्त्वाच्या तीन ठिकाणांना लक्ष्य केले:
१. बंदर अब्बास : इराणचे मुख्य सागरी केंद्र आणि लष्करी तळ.
२. जास्क : किनारपट्टीवरील मोक्याचे ठिकाण.
३. केशम द्वीप : होर्मुज सामुद्रधुनीतील इराणचे महत्त्वाचे बेट.

या तिन्ही ठिकाणी अमेरिकन विमानांनी इराणची हवाई संरक्षण यंत्रणा, ग्राउंड कंट्रोल स्टेशन्स आणि देखरेख ठेवणारी रडार यंत्रणा आधुनिक ‘प्रिसिजन म्युनशन्स’चा (अचूक मारा करणारी क्षेपणास्त्रे) वापर करून उद्ध्वस्त केली आहे.

डोनाल्ड ट्रम्प यांच्या आदेशानंतर ‘प्रिसिजन स्ट्राईक’

CENTCOMने दिलेल्या माहितीनुसार, ९ जून रोजी अमेरिकेचे राष्ट्राध्यक्ष डोनाल्ड ट्रम्प यांनी दिलेल्या थेट आदेशानंतर ही मोठी लष्करी कारवाई करण्यात आली. एक दिवसापूर्वी म्हणजेच सोमवारी इराणने होर्मुज सामुद्रधुनीमध्ये अमेरिकेचे अपाचे हेलिकॉप्टर पाडले होते, ज्याला अमेरिकेने हे चोख प्रत्युत्तर दिले आहे.

अमेरिकेचे म्हणणे आहे की, हे केवळ अपाचे हेलिकॉप्टर पाडल्याचा बदला घेण्यासाठी नव्हते, तर गेल्या काही दिवसांत अमेरिकन सैनिक आणि या आंतरराष्ट्रीय जलमार्गावरून जाणाऱ्या व्यापारी जहाजांवर झालेल्या हल्ल्यांना रोखण्यासाठी उचललेले हे कायदेशीर पाऊल होते.

इराणचा पलटवार: “अमेरिकेला केवळ युद्धाचे बहाणे हवेत”

दुसरीकडे, इराणने अमेरिकेचे सर्व आरोप फेटाळून लावत आक्रमक पवित्रा घेतला आहे. “आम्ही अमेरिकेचे कोणतेही अपाचे हेलिकॉप्टर पाडलेले नाही. अमेरिका केवळ इराणवर हल्ला करण्यासाठी आणि आंतरराष्ट्रीय स्तरावर आमची कोंडी करण्यासाठी अपघाताचे खोटे बहाणे शोधत आहे,” असा प्रत्यारोप इराणच्या परराष्ट्र मंत्रालयाने केला आहे.

अमेरिकन लष्कर हाय-अलर्टवर!

या भीषण हवाई हल्ल्यांनंतर मध्य पूर्वेमध्ये कोणत्याही क्षणी इराणकडून मोठ्या प्रतिहल्ल्याची शक्यता वर्तवली जात आहे. हीच शक्यता गृहीत धरून अमेरिकन सेंट्रल कमांडने स्पष्ट केले आहे की, आमचे सैनिक आणि युद्धनौका या भागात पूर्णपणे सतर्क आहेत. इराणने जर पुन्हा कोणतीही आगळीक केली, तर त्याला यापेक्षाही भयानक उत्तर दिले जाईल, असा सज्जड दम अमेरिकेने भरला आहे. या नव्या संघर्षामुळे संपूर्ण आखाती देशांमध्ये युद्धाचे ढग गडद झाले असून, जागतिक तेल पुरवठ्यावरही याचा मोठा परिणाम होण्याची भीती व्यक्त केली जात आहे.