शरीराला जबरदस्त फायदे! पेरू की केळी? थंडीत कोणतं फळ खाणं अधिक फायदेशीर? पोषणमूल्यांमध्ये कोण पुढे?

Health News : हिवाळ्याची चाहूल लागताच बाजारात वेगवेगळ्या फळांची रेलचेल पाहायला मिळते. त्यात पेरू हे अनेकांच्या आवडीचं फळ असतं. थंडीच्या दिवसांत हिरवेगार, आंबट-गोड पेरू खाण्याची मजा काही औरच!
दुसरीकडे केळे हे वर्षभर सहज उपलब्ध होणारं आणि लहानांपासून मोठ्यांपर्यंत सर्वांच्या आवडीचं फळ आहे. दोन्ही फळं चवीला वेगवेगळी असून, आरोग्यासाठी फायदेशीर आहेत. तसेच पेरू आणि केळी यातील कोणत्या फळातून शरीराला कोणतं पोषण मिळतं? रोगप्रतिकारशक्ती वाढवणे, पचन सुधारणे आणि शरीराला ऊर्जा मिळण्यासाठी या दोनपैकी कोणतं फळ खावं? जाणून घेऊया.
१. पेरूमध्ये कोणते पोषक घटक?
पेरू हे स्वस्त आणि सहज उपलब्ध होणारं फळ असलं तरी त्याचे पोषणमूल्य खूप जास्त आहे. विशेष म्हणजे पेरूमध्ये व्हिटॅमिन सी मोठ्या प्रमाणात आढळतं. शरीराची रोगप्रतिकारशक्ती योग्य प्रकारे काम करण्यासाठी या जीवनसत्त्वाची आवश्यकता असते. बदलत्या हवामानात शरीराला आवश्यक पोषण मिळवण्यासाठी पेरूचा आहारात समावेश करता येतो.
त्याशिवाय पेरूमध्ये फायबर, पोटॅशियम, फोलेट आणि अँटीऑक्सिडंट्स असतात. फायबरमुळे पचनक्रिया सुरळीत राहण्यास मदत होते. तसेच पेरू खाल्ल्यानंतर बराच वेळ पोट भरल्यासारखं वाटतं. त्यामुळे सतत भूक लागणाऱ्या आणि वजन नियंत्रणात ठेवण्याचा प्रयत्न करणाऱ्या व्यक्तींसाठी पेरू चांगला पर्याय ठरू शकतो.
२. केळी खाण्याचे काय फायदे?
केळी हे शरीराला झटपट ऊर्जा देणारं फळ म्हणून ओळखलं जातं. त्यामध्ये नैसर्गिक साखर आणि कार्बोहायड्रेट्स असतात. त्यामुळे थकवा जाणवत असल्यास किंवा व्यायामापूर्वी शरीराला ऊर्जा हवी असल्यास केळी खाणं फायदेशीर ठरू शकतं.
केळ्यामध्ये पोटॅशियम आणि व्हिटॅमिन बी६ असतं. पोटॅशियममुळे स्नायूंचं कार्य आणि रक्तदाब नियंत्रणात ठेवण्यास मदत होते. तर व्हिटॅमिन बी६ शरीरातील अनेक महत्त्वाच्या प्रक्रियांमध्ये भूमिका बजावतं. त्यामुळे रोजच्या आहारात केळ्याचा समावेश करणं आरोग्यासाठी चांगलं मानलं जातं.
३. रोगप्रतिकारशक्ती वाढवण्यासाठी कोणतं फळ चांगलं?
हिवाळ्यात सर्दी, खोकला आणि संसर्गाचा त्रास अनेकांना होतो. अशा काळात शरीराला आवश्यक जीवनसत्त्वे आणि पोषक घटक मिळणं महत्त्वाचं असतं.
पेरूमध्ये केळ्याच्या तुलनेत व्हिटॅमिन सीचं प्रमाण खूप जास्त असतं. व्हिटॅमिन सी शरीराच्या रोगप्रतिकारक यंत्रणेच्या सामान्य कार्यासाठी आवश्यक आहे. त्यामुळे या पोषक घटकाच्या बाबतीत पेरू वरचढ ठरतो. मात्र, केळ्यामधील इतर पोषक घटकही शरीरासाठी महत्त्वाचे आहेत.
४. पचनासाठी पेरू की केळी?
पोट साफ होण्यासाठी आणि बद्धकोष्ठतेचा त्रास कमी करण्यासाठी आहारात फायबर असणं गरजेचं आहे. पेरूमध्ये केळ्याच्या तुलनेत अधिक फायबर असतं. त्यामुळे पेरू खाल्ल्यानं आतड्यांचं कार्य सुरळीत राहण्यास आणि मलविसर्जनास मदत होऊ शकते.
केळ्यामध्येही फायबर असतं. त्यामुळे पचनाच्या दृष्टीनं केळेदेखील चांगला पर्याय आहे. मात्र, पेरूमध्ये फायबरचं प्रमाण तुलनेनं जास्त असल्यानं या बाबतीत पेरूला अधिक महत्त्व देता येईल.
५. वजन कमी करण्यासाठी कोणतं फळ खावं?
वजन कमी करण्याचा प्रयत्न करत असाल, तर पेरू हा चांगला पर्याय ठरू शकतो. त्यामध्ये फायबरचं प्रमाण जास्त असल्यामुळे पोट भरल्याची भावना जास्त वेळ टिकते. त्यामुळे वारंवार भूक लागण्याचं प्रमाण कमी होण्यास मदत होऊ शकते.
दुसरीकडे केळ्यामध्ये नैसर्गिक साखर आणि कॅलरीज तुलनेनं जास्त असतात. मात्र, याचा अर्थ वजन कमी करताना केळी खाऊ नये, असा अजिबात नाही. व्यायाम करणाऱ्या किंवा दिवसभर शारीरिक हालचाल करणाऱ्या व्यक्तींसाठी केळे हे फळ ऊर्जेचा चांगला स्रोत आहे. फक्त त्याचं प्रमाण लक्षात घेणं महत्त्वाचं आहे.
६. मग हिवाळ्यात पेरू खावा की केळी?
दोन्ही फळांचे फायदे वेगवेगळे आहेत. व्हिटॅमिन सी, फायबर आणि अँटीऑक्सिडंट्स हवे असतील, तर पेरू अधिक फायदेशीर ठरतो. तर शरीराला झटपट ऊर्जा, पोटॅशियम आणि व्हिटॅमिन बी६ मिळवण्यासाठी केळी हा चांगला पर्याय आहे.
त्यामुळे एकाच फळाला सर्वोत्तम मानण्यापेक्षा दोन्ही फळांचा आहारात समावेश करणं अधिक योग्य ठरेल. हिवाळ्यात पेरूचा आनंद घ्या आणि रोजच्या आहारात केळीदेखील ठेवा. शरीराला वेगवेगळे पोषक घटक मिळण्यासाठी फळांमध्ये विविधता असणं महत्त्वाचं आहे.
(टीप : ही माहिती सामान्य आरोग्यविषयक माहितीसाठी आहे. आहारात बदल करण्यापूर्वी डॉक्टर किंवा आहारतज्ज्ञांचा सल्ला घ्यावा.)



