Pune Leopard Attack: शेतातील कामासाठी दुचाकीवरून निघालेल्या दाम्पत्यावर रस्त्याच्या कडेला दबा धरून बसलेल्या बिबट्याने अचानक झडप घातल्याची धक्कादायक घटना जुन्नर तालुक्यातील बोरी बुद्रुक येथील मेटांगळे शिवारात घडली. या हल्ल्यात दुचाकीवरील ताबा सुटल्याने पती-पत्नी रस्त्यावर कोसळले. सुदैवाने महिलेच्या पाठीवर असलेला फवारणी पंप बिबट्याच्या हल्ल्यात ढालीसारखा ठरल्याने मोठा अनर्थ टळला.

दुचाकीवर अचानक बिबट्याची झडप

विद्या दत्तात्रय शिंदे आणि त्यांचे पती दत्तात्रय बाळाजी शिंदे हे शेतातील कामासाठी दुचाकीवरून जात होते. मेटांगळे शिवारातून जात असताना रस्त्याच्या कडेला दबा धरून बसलेल्या बिबट्याने त्यांच्या दुचाकीवर अचानक झडप घेतली. अनपेक्षित हल्ल्यामुळे दत्तात्रय शिंदे यांचा दुचाकीवरील ताबा सुटला आणि दोघेही खाली पडले.

फवारणी पंपामुळे मोठा अनर्थ टळला

घटनेच्या वेळी विद्या शिंदे यांच्या पाठीवर शेतातील कामासाठी वापरण्यात येणारा फवारणी पंप अडकवलेला होता. त्यामुळे बिबट्याला त्यांच्या शरीरावर थेट हल्ला करता आला नाही. फवारणी पंपामुळे बिबट्याची झडप निष्फळ ठरली आणि त्यांचा जीव वाचला. मात्र दुचाकीवरून खाली पडल्यामुळे विद्या शिंदे यांच्या पायाला किरकोळ दुखापत झाली.

वनविभागाकडून परिसरात पिंजरा

या घटनेची माहिती मिळाल्यानंतर वनपाल गणेश बागडे यांनी घटनास्थळी भेट देऊन पाहणी केली. बिबट्याच्या वावरामुळे स्थानिक नागरिक आणि शेतकऱ्यांच्या सुरक्षेचा प्रश्न निर्माण झाल्याने वनविभागाने परिसरात बिबट्याला पकडण्यासाठी पिंजरा लावला आहे.

यावेळी रेस्क्यू टीमचे संतोष कुतळ, रोहित बोडके आणि जयेश भोर उपस्थित होते. बिबट्याच्या अचानक झालेल्या या हल्ल्यामुळे परिसरातील शेतकऱ्यांमध्ये भीतीचे वातावरण निर्माण झाले आहे.

दरम्यान जुन्नर परिसरात मानव-बिबट संघर्ष गंभीर बनला असून, 2021 पासून बिबट्यांच्या हल्ल्यांत 22 नागरिकांचा मृत्यू आणि 42 जण जखमी झाल्याची नोंद आहे. 2026 मध्ये आतापर्यंत जुन्नर वन विभागात एका मृत्यूची नोंद झाली आहे. बिबट्यांचा वाढता वावर लक्षात घेता वनविभागाकडून संवेदनशील भागांत पिंजरे, एआय आधारित अलर्ट यंत्रणा आणि बचाव पथकांच्या माध्यमातून उपाययोजना केल्या जात आहेत.