पूर्व युक्रेनचा बालेकिल्ला असलेल्या क्रामतोर्स्कमधील एका रस्त्यावर गुरुवारी रशियन बॉम्बहल्ला झाला. या वर्षात युक्रेनमध्ये झालेल्या सर्वात प्राणघातक हल्ल्यांपैकी एक असलेल्या या हल्ल्यात किमान ३३ लोक ठार झाले आहेत.

१८ जण जखमी झाले.

रॉयटर्स वृत्तसंस्थाच्या रिपोर्टनुसार, हा हल्ला अशा भागात झाला जिथे शहरातल्या दोन बस चालत होत्या. शहरातील नेहमीची वर्दळ असणाऱ्या रस्त्याची बॉम्बस्फोटानंतर स्मशानासारखी स्थिती झाली. युक्रेनचे राष्ट्राध्यक्ष व्लोडिमिर झेलेन्स्की यांनी या ठिकाणाचे वर्णन बस स्टॉप असे केले.

“त्यांच्यासाठी (रशिया) प्रवाशांनी भरलेली बस हे एक चांगले टार्गेट आहे कारण एकाच हल्ल्यात जास्तीत जास्त लोकांना मारले जाऊ शकते,” असे प्रांतीय गव्हर्नर वादिम फिलाशकिन यांनी टेलिग्रामवर सांगितले.

युक्रेनियन पोलिसांनी प्रसिद्ध केलेल्या चित्रांमध्ये विखुरलेल्या ढिगाऱ्यात मृतदेह पडलेले दिसत होते, तर जवळच एका बसचे जळलेले अवशेष दिसत होते.

फेब्रुवारी २०२२ मध्ये सुरू झालेल्या युक्रेनवरील हल्ल्यादरम्यान मुद्दामहून नागरिकांना लक्ष्य केल्याचा आरोप रशियाने वारंवार फेटाळला आहे.

वाढत्या हल्ल्यांचा क्रामतोर्स्कला फटका

क्रामतोर्स्क हे डोनेस्तक प्रदेशात युक्रेनच्या बचावाचा कणा असलेल्या फोर्ट्रेस बेल्टमधील (बालेकिल्ल्यांचा पट्टा) प्रमुख शहरांपैकी एक आहे. स्थानिक अधिकाऱ्यांचे म्हणणे आहे की, रशियन सैन्याने क्रामतोर्स्क आणि परिसरातील इतर शहरांवर ड्रोन आणि मार्गदर्शित-बॉम्ब हल्ले तीव्र केले आहेत.

युद्ध संपवण्याच्या तडजोडीचा भाग म्हणून युक्रेनच्या नियंत्रणाखालील डोनेस्तक प्रदेशाचे उर्वरित भाग सोपवून द्यावेत अशी मागणी रशियाने युक्रेनकडे केली आहे. युक्रेनने ही मागणी फेटाळून लावली आहे.

दबाव असूनही, या प्रदेशातील रशियाची प्रादेशिक प्रगती या वर्षी लक्षणीयरीत्या मंदावली आहे. गुरुवारच्या हल्ल्यानंतर फिलाशकिन यांनी क्रामतोर्स्क आणि जवळील स्लोव्हियान्स्क (फोर्ट्रेस बेल्टमधील आणखी एक धोरणात्मकदृष्ट्या महत्त्वाचे शहर) येथील अधिकाऱ्यांना सार्वजनिक वाहतूक निलंबित करण्याचे आदेश दिले.