रात्रीस खेळ चाले’ या मालिकेत शेवंताची भूमिका साकारून घराघरात पोहोचलेली अभिनेत्री अपूर्वा नेमळेकर सोशल मीडियावर खूप सक्रिय असते. पतीसोबत विविध रील्स आणि फोटो ती चाहत्यांसोबत शेअर करत असते.

मात्र अशाच एका पोस्टवर तिच्या दिसण्यावरून एका युजरने अत्यंत वाईट कमेंट केली. ‘किती जाड-वयस्कर दिसते, लहान वयाच्या मुलासोबत लग्न केलं’, असं म्हणत अपूर्वाला एका महिलेनं ट्रोल केलं. या ट्रोलिंगनंतर अपूर्वाने ‘मला फरक पडत नाही, पण ही विकृती आहे’, असं म्हणत संबंधित महिलेला चांगलंच सुनावलं होतं. त्यानंतर आता अपूर्वाने तिच्या इन्स्टाग्रामवर आणखी एक पोस्ट लिहिली आहे. ‘जेव्हा एक बाईच दुसऱ्या बाईला खाली खेचण्याचा प्रयत्न करते, तेव्हा जास्त वाईट वाटतं’, असं तिने या पोस्टमध्ये म्हटलंय.

अपूर्वा नेमळेकरची पोस्ट-

‘माझ्या लाडक्या प्रेक्षकांसाठी.. मनापासून काहीतरी.. गेल्या काही दिवसांत घडलेल्या प्रसंगावर एका बाईने माझ्याबद्दल जी वाईट कमेंट केली, त्यामुळे मी जितकी दुखावले गेले, त्याहून अधिक त्रास माझ्या प्रेक्षकांना झाला हे मी पाहिलं. मीडियानेही याची दखल घेतली आणि अनेकांनी मला इग्नोर कर असा प्रेमाचा सल्ला देत धीर दिला. या संपूर्ण प्रकरणात दोन गोष्टी प्रकर्षाने समोर आल्या. पहिली- समाजात वाईट वृत्तीचे लोक असतातच आणि जेव्हा एक बाईच दुसऱ्या बाईला खाली खेचण्याचा प्रयत्न करते, तेव्हा जास्त वाईट वाटतं. पण दुसरी आणि सर्वांत महत्त्वाची गोष्ट म्हणजे, तुमचं माझ्यावर असलेलं अथांग आणि नि:स्वार्थ प्रेम,’ अशी पोस्ट तिने लिहिली आहे.

या पोस्टमध्ये तिने पुढे म्हटलंय, ‘फेसबुक असो किंवा इन्स्टाग्राम मी स्वत: तुमचे पाठवलेले मेसेज वाचले आणि शक्य तितक्या प्रत्येकाला उत्तर देण्याचा प्रयत्न केला. तुमचं हे पाठबळ बघून अक्षरश: माझं मन भरून आलंय. आज मला जाणीव झाली की तुम्ही माझ्याकडून किती अपेक्षा ठेवता आणि म्हणूनच माझी जबाबदारी आता अजून वाढली आहे. मी तुमची आयुष्यभरासाठी ऋणी आहे. तुमचं हे प्रेम असंच कायम राहो. मी वचन देते.. वेगवेगळ्या माध्यमातून आणि नवनवीन कलाकृतींमधून तुम्हा सगळ्यांचं निरंतर मनोरंजन करत राहीन. मनापासून खूप खूप प्रेम आणि कृतज्ञता.’

‘या ज्या व्यक्ती आहेत, त्यांचं नाव राजश्री विरनक असं आहे. त्या ठाणे महानगरपालिकेच्या अतिक्रमण विभागात कार्यरत आहेत. एवढ्या जबाबदार प्रशासकीय यंत्रणेत आणि महत्त्वाच्या विभागात एका पदावर काम करत असताना, त्यांच्याकडून किमान नागरी भान आणि नैतिक जबाबदारीची अपेक्षा असते. एका शासकीय सेवेत असलेल्या सुशिक्षित व्यक्तीने सार्वजनिक किंवा सोशल मीडियावर अशा प्रकारची भूमिका घेणे हे खरंच धक्कादायक आहे,’ असंही तिने पुढे म्हटलंय.