नवी दिल्ली – बाजार नियामक सेबीने मंगळवारी अदानी समूहाच्या पाच कंपन्यांविरोधातील चौकशी प्रक्रिया निकाली काढली आहे. संबंधित पक्षांमधील व्यवहारांची माहिती उघड न करणे आणि ऑडिट तसेच मर्यादित पुनरावलोकन अहवालांशी संबंधित नियमांचे उल्लंघन केल्याच्या आरोपांनंतर ही कारवाई करण्यात आली होती.
या प्रकरणाचा निपटारा करण्यासाठी संबंधित कंपन्यांनी एकत्रितपणे १.५ कोटी रुपयांचे सेटलमेंट शुल्क भरले आहे.
जानेवारी २०२३ मध्ये अमेरिकेतील शॉर्ट-सेलिंग फर्म ‘हिंडेनबर्ग रिसर्च’ने केलेल्या आरोपांवरून सेबीने ही चौकशी सुरू केली होती. यामध्ये लिस्टिंग नियमांचे आणि पूर्वीच्या लिस्टिंग करारांचे संभाव्य उल्लंघन केल्याचा संशय होता.
सेबीच्या सेटलमेंट आदेशानुसार, या पाच कंपन्यांमध्ये अदानी एंटरप्रायझेस लिमिटेड, अदानी टोटल गॅस लिमिटेड, एडब्ल्यूएल ॲग्रो बिझनेस लिमिटेड (पूर्वीची अदानी विल्मर लिमिटेड), अदानी ग्रीन एनर्जी लिमिटेड आणि अदानी एनर्जी सोल्यूशन्स लिमिटेड (पूर्वीची अदानी ट्रान्समिशन लिमिटेड) यांचा समावेश आहे.
सेबीने अदानी समूहातील पाच कंपन्यांवर काही व्यवहारांची आवश्यक माहिती सार्वजनिक न केल्याच्या आरोपांवरून कारवाई केली. तसेच, अधिकृत तपासणीचे प्रमाणपत्र नसलेल्या लेखापरीक्षण संस्थेकडून काही आर्थिक अहवाल तपासून घेतल्याचा आरोप होता. या प्रकरणी सेबीने फेब्रुवारी २०२४ मध्ये कंपन्यांना कारणे दाखवा नोटीस बजावली होती. नियमांच्या उल्लंघनांबद्दल चौकशी का केली जाऊ नये आणि दंड का आकारला जाऊ नये, याचे स्पष्टीकरण देण्यास कंपन्यांना सांगण्यात आले होते.
