गेल्या दोन दिवसांपासून बुलढाण्याचं राजकारण ढवळून निघालं आहे. काँग्रेसचे चिखली मतदारसंघाचे माजी आमदार राहुल बोंद्रे यांच्या भाजप प्रवेशाच्या चर्चांना अखेर पूर्णविराम मिळाला आहे.

भाजप प्रवेशाच्या अंतिम टप्प्यात काँग्रेसचे सर्वोच्च नेते राहुल गांधी यांनी फोनवर संवाद झाल्यानंतर बोंद्रे यांना त्यांचा निर्णय बदलण्यास भाग पाडले. बोंद्रे यांच्या यू टर्नवरुन पुन्हा एकदा आरोप-प्रत्यारोपांच्या फैरी झडू लागल्या आहेत. अशातच शिवसेनेचे बुलढाण्याचे आमदार संजय गायकवाड यांनीही बोंद्रे यांच्या भाजपप्रवेशावरुन धक्कादायक विधान करत नवा राजकीय बॉम्ब टाकला आहे.

शिवसेना नेते संजय गायकवाड यांनी मंगळवारी (ता.22) माध्यमांशी संवाद साधला. यावेळी त्यांनी काँग्रेसचे नेते राहुल बोंद्रे यांच्याविषयी मोठं विधान केलं.ते म्हणाले,राहुल बोंद्रे यांचा शिवसेना प्रवेश आधी ठरला होता.एकनाथ शिंदे यांची आम्ही भेटही घेतली होती. त्याचे व्हिडीओ आणि फोटोही माझ्याकडे असल्याचं त्यांनी म्हटलं.

राहुल बोंद्रे हे आधी शिवसेनेत येणार होते,मात्र संवादाच्या अभावामुळे भाजपने त्यांच्यासाठी जोर लावला. पुढच्या काही दिवसांत त्यांचा पक्षप्रवेश होणार होता.पण शिंदेसाहेबांना दिल्लीला जायचं होतं. मला ते म्हणाले, दोन-चार दिवसांनी आपण येऊ. त्याचदरम्यान,बुलढाणा जिल्हा बँकेची निवडणूक लागली. त्यात 20-22 दिवस गेले आणि 15 दिवस कर्नाटकला गेले.त्यामुळे बोंद्रे यांच्या पक्षप्रवेशाच्या प्रक्रियेत मोठा कम्युनिकेशन गॅप पडल्याची कबुली गायकवाड यांनी यावेळी दिली.

त्यादरम्यान,भाजपच्या वरिष्ठ पातळीवरुन राहुल बोंद्रेंना फोन गेले की, तुम्ही एकनाथ शिंदेंच्या शिवसेनेत जायचे नाही, तर आमच्याकडे या असं सांगण्यात आलं. तसेच त्यांना धमकीही देण्यात आली. त्यानंतर माझी आणि त्यांची एक बैठकही झाली. त्यांच्या कार्यकर्त्यांनीही बैठकीत एकनाथ शिंदेंच्या शिवसेनेत जायचंय असं सांगितलं, कारण एकनाथ शिंदेंवर तमाम महाराष्ट्राचा विश्वास आहे.

संजय गायकवाड म्हणाले, ज्यावेळी राहुल बोंद्रेंचं एकनाथ शिंदे साहेबांकडे जायचं असं ठरलं,तेव्हा त्यांना वरुन ज्याप्रकारे ब्लॅकमेल करण्यात आलं, धमक्या देण्यात आल्या. तुझं आम्ही जगणं मुश्किल करु,तुझं हे बाहेर काढून, ते बाहेर काढू. अक्षरश:त्यांच्या नरडीवर पाय देऊन त्यांचा पक्षप्रवेशाचा कार्यक्रम ठरला होता असा आरोपही आमदार संजय गायकवाड यांनी यावेळी केला.

पण काल काँग्रेसचे नेते राहुल गांधी यांचा त्यांच्याशी फोनवरुन संवाद झाला. त्यानंतर राहुल बोंद्रे यांनी आपला भाजपप्रवेशाचा निर्णय बदलल्याचं आपण सर्वांनी पाहिलं,असंही संजय गायकवाड यांनी सांगितलं.

आमदार संजय गायकवाड यांनी बोंद्रे यांच्यावर पक्षप्रवेशासाठी धमक्या आणि ब्लॅकमेलिंगच्या माध्यमातून दबाव आणला जात होता,असा आरोप केला आहे. यामुळे गेल्या काही दिवसांपासून आरोप-प्रत्यारोपांनी टोकदार होत चाललेला गायकवाड विरुद्ध भाजप आमदार श्वेता महाले वाद पुन्हा एकदा पेटण्याची शक्यता आहे.