अमेरिकेचे अर्थसचिव स्कॉट बेसेंट यांनी असा दावा केला आहे की, २३ सप्टेंबरपासून इराणच्या सर्व एअरलाइन्स बंद केल्या जातील. बेसेंट म्हणाले, ‘आम्ही हे कसे करू?

जर ती विमाने कुठे उतरली, तर तुम्ही त्यांना इंधन देऊ शकत नाही. तुम्ही त्यांना लँडिंग सेवा देऊ शकत नाही, तुम्ही त्यांना तिकिटे विकू शकत नाही, अन्यथा तुम्हाला डॉलर प्रणालीतून  बाहेर काढले जाईल.”

सीएनबीसी च्या वृत्तानुसार, बेसेंट यांनी त्यांच्या ‘स्क्वॉक बॉक्स’  कार्यक्रमात हा दावा केला. अर्थसचिवांनी सांगितले की, वॉशिंग्टन इराणवर पूर्वीपेक्षा अधिक दबाव टाकत आहे. ते म्हणाले की, अमेरिका जगभरात इराणला मदत करणाऱ्यांच्या बँकांवर बंदी घालून त्यांना रोखत आहे. उल्लेखनीय आहे की, अर्थ मंत्राल्याने गेल्या आठवड्यात रशियाच्या सरकारी ‘व्हीटीबी बँके’वर  या उद्देशाने नवीन निर्बंध जाहीर केले होते. इराणला आर्थिकदृष्ट्या एकाकी पाडण्याच्या प्रयत्नांचाच हा एक भाग होता.

हुती बंडखोरांनी नुकताच लाल समुद्रातील येमेनच्या पेरीम बेटावर ताबा मिळवला आहे. यामुळे बाब-अल-मांदेब सामुद्रधुनीवर त्यांची पकड मजबूत झाली आहे. यामुळे इराण आणि त्याचे सहयोगी दोन अत्यंत महत्त्वाचे तेल ‘चोक पॉईंट्स’ (संवेदनशील सागरी मार्ग) – बाब-अल-मांदेब आणि होर्मुझ सामुद्रधुनीवर नियंत्रण मिळवण्याच्या स्थितीत आले आहेत. बाब-अल-मांदेब सामुद्रधुनी ही तेल निर्यातीसाठी होर्मुझ सामुद्रधुनीचा एक महत्त्वाचा पर्याय आहे, विशेषतः सौदी अरेबियासाठी. सौदी अरेबियाची ‘ईस्ट-वेस्ट पाईपलाईन’ त्यांना त्यांच्या काही तेलाचा पुरवठा लाल समुद्रातून निर्यात करण्याची सुविधा देते.