पुणे शिक्षक मतदारसंघातून इच्छुक उमेदवार कामाला लागले आहेत. महायुतीची ताकद पाहता येथे त्यांचा उमेदवार सहज विजयी होईल, असे अंदाज बांधले जात आहे. त्यातच मागील काही महिन्यांपासून शिक्षक मतदारसंघाची तयारी करणारे एकनाथ शिंदेंचे विश्वासू शिलेदार मंगेश चिवटे यांनी जोरदार तयारी सुरु केली आहे. आपल्यालाच संधी मिळेल, असा विश्वास व्यक्त करत त्यांनी महायुतीमधून आपल्याला पाठींबा मिळेल, असे देखील सांगितले होते. दरम्यान, या मतदारसंघातून अनेक जण इच्छुक आहेत. त्यामुळे भाजप नेमकी काय भूमिका घेणार याची देखील चर्चा होत आहे.

सोलापूरचे पालकमंत्री जयकुमार गोरे यांनी पंढपूरमध्ये केलेल्या एका वक्तव्यामुळे पुणे शिक्षक मतदारसंघात मोठा ट्विस्ट आला आहे. ते म्हणाले, पदवीधर मतदारसंघ आणि पुणे शिक्षक मतदरासंघ हे महायुतीमधूनच लढण्याचा प्रयत्न आहे. मात्र, वेळ पडल्यास भाजप म्हणून या निवडणुकीला दोन्ही मतदारसंघात सामोरे जाऊ.

उमेदवारी कोणाला?

गोरे यांच्या वक्तव्यामुळे भाजपकडून पुणे शिक्षक मतदारसंघावर दावा सांगितल्याची चर्चा आहे. या मतदारसंघातून मंगेश चिवटे हे अनेक दिवसांपासून तयारी सुरू करत आहेत. तर, मंत्री उदय सामंत यांचे ओएसडी सचिन सानप देखील याच मतदारसंघातून तयारी करत आहे. या दोन्ही संभाव्या उमेदवारांनी गाठीभेटी घेण्यास सुरुवात केली आहे. त्यातच भाजप देखील ही निवडणूक लढण्याची तयारी करत असल्याने महायुतीमध्ये नेमका काय निर्णय होणार याची उत्सुकता वाढली आहे.

मतदार किती?

पुणे विभाग शिक्षक मतदारसंघातील निवडणुकीतील इच्छुकांची संख्या पाहाता ही निवडणूक चुरशीची होणार आहे. पाच जिल्ह्यांमध्ये या मतदारसंघाचे मतदार आहेत. पुणे, सातारा, सांगली, कोल्हापूर आणि सोलापूर या पाच जिल्ह्यांमधून तब्बल ५२ हजार ८०० हून अधिक शिक्षक मतदारा आहेत. त्यामुळे इच्छुक उमेदवारांचा मोठा कस लागणार आहे.