गेल्या काही दिवसांपासून सुरू असलेली भारतीय शेअर बाजारांतील घसरण आजही पाहायला मिळत आहे. गुरुवारी निफ्टी ५० आणि सेन्सेक्स या प्रमुख निर्देशांक घसरणीसह व्यवहाराची सुरुवात केली.

पश्चिम आशियातील वाढता संघर्ष आणि त्यामुळे कच्च्या तेलाच्या किमती प्रति बॅरल ११० डॉलर्सच्या वर कायम असल्याने भारतात महागाईची चिंता वाढली आहे.

सकाळी ९:३० च्या सुमारास, सेन्सेक्स ५९९.४७ अंशांनी किंवा ०.८१ टक्क्यांनी घसरून ७३,११०.२२ वर होता, तर निफ्टी २२६.२० अंशांनी किंवा ०.९९ टक्क्यांनी घसरून २२,५८५.१५ वर आला होता.

यानंतर दोन्ही प्रमुख निर्देशांकांनी आपली घसरण भरून काढण्यात यश मिळवले. सकाळी ११:०० वाजता सेन्सेक्स १९४.४९ अंशांनी घसरून ७३,५१५.२० वर, तर निफ्टी ८४.५५ अंशांनी घसरून २२,७२६.८० वर व्यवहार करत होता.

कच्च्या तेलाच्या किमतीत वाढ

सौदी अरेबियामध्ये येमेनच्या हुथी बंडखोरांकडून झालेल्या हल्ल्यांच्या पार्श्वभूमीवर, अमेरिकेने सौदी अरेबियातील आपल्या दूतावासांमधील काही अधिकाऱ्यांना आणि त्यांच्या कुटुंबीयांना देश सोडण्याचे आदेश दिले आहेत. या घडामोडींमुळे कच्च्या तेलाच्या किमतीत १.६ टक्क्यांची वाढ होऊन ती प्रति बॅरल ११०.६ डॉलर्सवर पोहोचली आहे.

इंडिया VIX मध्ये वाढ

शेअर बाजाराचा अस्थिरता निर्देशांक इंडिया VIX सुमारे ६ टक्क्यांनी वाढून १६.५५ च्या पातळीवर पोहोचला आहे, जे गुंतवणूकदारांमधील वाढती अनिश्चितता दर्शवते.

तेजी कधी येणार?

जिओजित इन्व्हेस्टमेंट्सचे मुख्य बाजार धोरणकर्ते आनंद जेम्स म्हणाले, “काल झालेली घसरण आणि निफ्टीवर २२७०० या खालच्या पातळीच्या मर्यादेवर आलेला दबाव पुढे आणखी मोठ्या घसरणीचा इशारा देत आहेत. बाजारात सुधारणेची आशा २२५९० ही पातळी टिकून राहण्यावर अवलंबून आहे. मात्र, बाजारात पुन्हा तेजी येण्यासाठी निर्देशांक २२८४० च्या वर जाणे आवश्यक आहे.”