युनायटेड फोरम ऑफ बँक युनियन्सने (UFBU) २८ ते ३० सप्टेंबरदरम्यान तीन दिवसांच्या देशव्यापी संपाची हाक दिल्याने बँकिंग सेवा विस्कळीत होण्याची दाट शक्यता आहे.

स्थैर्य,सातारा, दि. २० सप्टेंबर : पाच दिवसांचा आठवडा लागू करण्यासह प्रलंबित मागण्यांसाठी युनायटेड फोरम ऑफ बँक युनियन्सने (UFBU) २८ ते ३० सप्टेंबरदरम्यान तीन दिवसांच्या देशव्यापी संपाची घोषणा केली आहे.

शनिवार आणि रविवारी जोडून आलेल्या या संपामुळे सलग पाच दिवस बँक शाखांमधील कामकाज प्रभावित होण्याची शक्यता निर्माण झाली आहे. या पार्श्वभूमीवर स्टेट बँक ऑफ इंडियाने (SBI) ग्राहकांना आपल्या महत्त्वाची कामे आधीच पूर्ण करण्याचे आवाहन केले आहे.

युनायटेड फोरम ऑफ बँक युनियन्सच्या या संपात देशातील नऊ प्रमुख बँक संघटना सहभागी होणार आहेत. त्यामुळे राष्ट्रीयकृत आणि सार्वजनिक क्षेत्रातील बँकांमधील धनादेश वटवणे, रोख रक्कम भरणे आणि इतर प्रशासकीय सेवा ठप्प होण्याची भीती आहे. सार्वजनिक सुट्ट्या आणि संप एकापाठोपाठ आल्याने एटीएम सेवांवरही ताण येण्याची शक्यता वर्तवली जात आहे.

संप काळात ग्राहकांची गैरसोय टाळण्यासाठी बँकांनी इंटरनेट बँकिंग, मोबाईल ॲप, यूपीआय आणि इतर डिजिटल सेवा वापरण्याचा सल्ला दिला आहे. रोख रकमेची गरज असल्यास ती वेळेत काढून ठेवावी आणि आवश्यक व्यवहार संपाच्या आधीच पूर्ण करून घ्यावेत, असे स्पष्ट निर्देश प्रशासनाकडून देण्यात आले आहेत.