लहान बाळांच्या फॉर्म्युला मिल्कबाबत भारतीय अन्न सुरक्षा आणि मानक प्राधिकरणानं (FSSAI) नेस्ले इंडिया लिमिटेडविरुद्ध कायदेशीर कारवाई सुरू केली आहे. यात कंपनीच्या एकूण तीन न्यूट्रिएंट्स प्रोडक्ट्सचा समावेश आहे.

FSSAI च्या अॅडज्युडिकेशन सेक्शन नोटीसनुसार, नेस्लेच्या NAN एक्सेला प्रो स्टेज १, लॅक्टोजेन प्रो १ आणि फॉलो-अप फॉर्म्युलाबाबत स्पष्टीकरण मागण्यात आलंय. या प्रोडक्ट्सच्या प्रमोशनल दाव्यांत नियमांचं उल्लंघन आढळल्याची माहिती समोर आली आहे.

FSSAI नुसार, NAN एक्सेला प्रो स्टेज १ च्या प्रचारात ५ HMOs आणि व्हे प्रोटीनसारखे दावे दिसून आले. तर, लॅक्टोजेन प्रो १ च्या प्रमोशनमध्ये व्हे प्रोटीनला सहज पचणारं असल्याचं सांगण्यात आलं होतं. FSSAI नं या दाव्यांबाबत कंपनीकडून स्पष्टीकरण मागितलंय. नोटीसमध्ये सांगण्यात आलंय की या प्रोडक्ट्समध्ये प्रचाराशी संबंधित नियमांचं उल्लंघन आढळलं. हा प्रचार या प्रोडक्ट्सची विक्री वाढवण्यासाठी करण्यात आला आहे.

एका प्रोडक्टमध्ये बायोटिनच्या प्रमाणाचीही तपासणी

हे प्रकरण फक्त प्रमोशनल दाव्यांपुरतेच मर्यादित नाही. FSSAI च्या अनुसार, नेस्ले इंडियाच्या एका फॉलो-अप फॉर्म्युलाच्या सॅम्पलच्या तपासणीत त्यात बायोटिनचं प्रमाणही जास्त आढळलं आहे. हे सॅम्पल चाचणीसाठी पुन्हा लॅबमध्ये पाठवण्यात आलं होतं. त्यातही बायोटिन निश्चित मापदंडापेक्षा जास्त आढळलं आहे.

तीन वेगवेगळी प्रकरणं दाखल

FSSAI नं स्पष्ट केलं की, या निष्कर्षांच्या पार्श्वभूमीवर त्यांनी नेस्ले इंडियाविरुद्ध संबंधित तीन उत्पादनांबाबत तीन प्रकरणं दाखल केली आहेत. कायदेशीर प्रक्रियेअंतर्गत यावर काम केलं जाईल. ‘मुलांसाठी अशा प्रकारचे प्रोडक्ट्स खरेदी करताना केवळ जाहिरातीत काय दाखवलं जात आहे तेवढंच पाहू नये. असे प्रोडक्ट्स डॉक्टरांच्या सल्ल्यानेच घ्यावेत. सध्या नेस्ले इंडिया लिमिटेडविरुद्धची कारवाई अॅडज्युडिकेशन प्रोसेसमध्ये आहे,’ असं FSSAI नं सांगितलंय.

शेअरची कामगिरी

दरम्यान, बीएसई (BSE) वर नेस्ले इंडियाच्या शेअर्समध्ये घसरण दिसून आली. इंट्राडे ट्रेडिंगदरम्यान, हा शेअर मागील बंद भाव ₹१,३७२ वरून घसरून ₹१,३३२.८० च्या पातळीवर आला. ऑगस्ट २०२६ मध्ये हा शेअर ₹१,५५३ या ५२-आठवड्यांच्या उच्चांकी पातळीवर पोहोचला होता. याउलट, गेल्या वर्षी त्याने ₹१,१४५.१० चा नीचांकी स्तर गाठला होता.