केंद्रीय अर्थमंत्री निर्मला सीतारमण यांनी  मुंबईत जेपी मॉर्गन चेस अँड कंपनीचे चेअरमन आणि मुख्य कार्यकारी अधिकारी जेमी डिमोन  यांची भेट घेतली.

ही भेट जेपी मॉर्गनच्या इंडिया इन्व्हेस्टर कॉन्फरन्सदरम्यान झाली. अर्थ मंत्रालयाने सोशल मीडिया प्लॅटफॉर्म ‘एक्स’वर याबाबत माहिती दिली आहे.

मुंबईत २१ आणि २२ सप्टेंबर रोजी जेपी मॉर्गनची ११वी इंडिया कॉन्फरन्स आयोजित करण्यात आली आहे. या परिषदेत जागतिक गुंतवणूकदार, कंपन्यांचे वरिष्ठ अधिकारी, धोरणकर्ते आणि इतर व्यावसायिक सहभागी झाले आहेत. जेपी मॉर्गनच्या माहितीनुसार, यंदाच्या परिषदेत १,००० हून अधिक जागतिक गुंतवणूकदार आणि वरिष्ठ अधिकारी सहभागी होत आहेत.

भारतातील गुंतवणुकीच्या संधींवर लक्ष

जेमी डिमोन यांच्या भारत दौऱ्याच्या पार्श्वभूमीवर ही भेट महत्त्वाची मानली जात आहे. डिमोन आपल्या दौऱ्यात भारतातील काही मोठ्या उद्योगसमूहांच्या वरिष्ठ अधिकाऱ्यांचीही भेट घेणार आहेत. जेपी मॉर्गन गेल्या काही वर्षांपासून भारतातील इन्व्हेस्टमेंट बँकिंग आणि पेमेंट सोल्युशन्ससह विविध क्षेत्रांमध्ये आपली उपस्थिती आणि टीम मजबूत करत आहे. २०२५ मध्ये भारतातील इक्विटी ऑफरिंगमध्ये जेपी मॉर्गन आघाडीवर राहिले होते. भारतातील वाढत्या भांडवल उभारणीच्या बाजारपेठेतील बँकेच्या वाढत्या भूमिकेचे हे द्योतक मानले जात आहे.

भारताला उत्पादन आणि टेक्नॉलॉजी हब बनवण्यावर भर

दरम्यान, अर्थमंत्री निर्मला सीतारमण यांनी ऑगस्टमध्ये जागतिक गुंतवणूकदारांना भारतात मॅन्युफॅक्चरिंग बेस तसेच टेक्नॉलॉजी आणि इनोव्हेशन सेंटर उभारण्याचे आवाहन केले होते. भारताकडे केवळ मोठी बाजारपेठ म्हणून न पाहता, जागतिक बाजारपेठेसाठी उत्पादने आणि तंत्रज्ञान विकसित करण्याचे केंद्र म्हणून पाहावे, असे आवाहन त्यांनी गुंतवणूकदारांना केले होते. भारतातील कुशल मनुष्यबळ आणि उपलब्ध संधींचा वापर करून जगासाठी उत्पादने व क्षमता विकसित करण्यावर त्यांनी भर दिला.