सकाळी उठल्यानंतर उशीवर पडलेले केस, आंघोळीनंतर बाथरूमच्या ड्रेनमध्ये अडकलेले केस किंवा केस विंचरताना हातात आलेला मोठा पुंजका… ही परिस्थिती अनेकांच्या आयुष्यात रोजचीच झाली आहे. त्यामुळे केस गळायला लागले की मनात लगेच चिंता निर्माण होते.

काहीजण तर थेट “हे कॅन्सरचं लक्षण तर नाही ना?” असा विचारही करू लागतात. पण खरंच केस गळणं म्हणजे कॅन्सरचा इशारा असतो का?

आरोग्य तज्ज्ञांच्या मते, केवळ केस गळत आहेत म्हणून कॅन्सरचा संशय घेणं योग्य नाही. आजच्या धावपळीच्या जीवनशैलीत केस गळण्यामागे अनेक कारणं असू शकतात आणि त्यापैकी बहुतेक कारणांचा कॅन्सरशी कोणताही संबंध नसतो.

तणाव आणि बदलती जीवनशैली ठरते मोठं कारण
आजकाल नोकरीचा ताण, आर्थिक चिंता, कौटुंबिक जबाबदाऱ्या आणि अपुरी विश्रांती यामुळे अनेकजण मानसिक तणावाखाली जगत आहेत. तज्ज्ञांच्या मते, सततचा तणाव केसांच्या आरोग्यावर थेट परिणाम करतो. त्यामुळे केस कमकुवत होऊन मोठ्या प्रमाणात गळू लागतात. याशिवाय अपुरी झोप, अनियमित दिनचर्या आणि चुकीच्या खाण्यापिण्याच्या सवयी यांचाही केसांवर नकारात्मक परिणाम होतो.

शरीरातील पोषणतत्त्वांची कमतरता देखील ठरू शकते कारण
शरीरात आयर्न, व्हिटॅमिन D आणि व्हिटॅमिन B12 यांसारख्या महत्त्वाच्या पोषणतत्त्वांची कमतरता असल्यास केसांना आवश्यक पोषण मिळत नाही. परिणामी केस पातळ होतात, कमकुवत होतात आणि गळण्याचं प्रमाण वाढू शकतं. विशेषतः महिलांमध्ये हार्मोन्समधील बदल, PCOD सारख्या समस्या आणि गर्भधारणेनंतर होणारे शारीरिक बदल यांमुळेही केस गळण्याची समस्या दिसून येते.

थायरॉईडमुळेही वाढू शकते समस्या
थायरॉईड हा शरीरातील अनेक महत्त्वाच्या प्रक्रियांवर नियंत्रण ठेवणारा हार्मोन आहे. थायरॉईडचे प्रमाण कमी किंवा जास्त झाल्यास त्याचा परिणाम केसांच्या वाढीवर होऊ शकतो. त्यामुळे केस पातळ होणे आणि मोठ्या प्रमाणात गळणे अशी लक्षणे दिसू शकतात.

प्रदूषण आणि केमिकलयुक्त उत्पादनांचाही परिणाम
वाढते प्रदूषण, सतत वापरले जाणारे केमिकलयुक्त हेअर प्रॉडक्ट्स, वारंवार केसांना रंग लावणे किंवा उष्णतेच्या मदतीने हेअर स्टायलिंग करणे यामुळेही केसांची गुणवत्ता खराब होऊ शकते. त्यामुळे केस कमकुवत होऊन तुटू किंवा गळू शकतात.

मग कॅन्सर आणि केस गळणं यांचा संबंध काय?
तज्ज्ञांच्या मते, कॅन्सरमुळे थेट केस गळतात असे नाही. मात्र कॅन्सरच्या उपचारांमध्ये वापरल्या जाणाऱ्या काही केमोथेरपी औषधांचा परिणाम केसांच्या मुळांवर होऊ शकतो. केमोथेरपी शरीरातील वेगाने वाढणाऱ्या पेशींवर परिणाम करते. यामध्ये केसांच्या मुळांतील पेशींचाही समावेश असतो. त्यामुळे काही रुग्णांचे केस उपचारादरम्यान पूर्णपणे गळू शकतात. मात्र ही स्थिती बहुतांश वेळा तात्पुरती असते. उपचार पूर्ण झाल्यानंतर अनेकांच्या डोक्यावर पुन्हा नवीन केस उगवू लागतात.

अचानक वजन कमी होणे
वारंवार ताप येणे
सतत आणि तीव्र थकवा जाणवणे
शरीरावर गाठी किंवा सूज दिसणे
अशा परिस्थितीत स्वतः निष्कर्ष काढण्यापेक्षा डॉक्टरांचा सल्ला घेणे अधिक योग्य ठरते.” width=”1200″ height=”900″ class=”size-full wp-image-1561286″ /> ही लक्षणेही दिसत असतील तर डॉक्टरांचा सल्ला घ्या
केस गळण्यासोबतच खालील लक्षणे दिसत असतील तर वैद्यकीय तपासणी करणे आवश्यक ठरू शकते.
अचानक वजन कमी होणे
वारंवार ताप येणे
सतत आणि तीव्र थकवा जाणवणे
शरीरावर गाठी किंवा सूज दिसणे
अशा परिस्थितीत स्वतः निष्कर्ष काढण्यापेक्षा डॉक्टरांचा सल्ला घेणे अधिक योग्य ठरते.[/caption]

केस गळत असतील तर घाबरू नका
केस गळण्यामागे अनेक कारणे असू शकतात. त्यामुळे सर्वप्रथम त्याचे मूळ कारण शोधणे महत्त्वाचे आहे. संतुलित आहार, पुरेशी झोप, तणावावर नियंत्रण आणि आवश्यक वैद्यकीय सल्ला यामुळे बहुतांश लोकांमध्ये ही समस्या कमी होऊ शकते. म्हणूनच केस गळत आहेत म्हणून लगेच कॅन्सरची भीती बाळगण्याऐवजी योग्य माहिती घेणे आणि तज्ज्ञांचा सल्ला घेणे हेच सर्वात शहाणपणाचे पाऊल ठरेल.

(नोट : वरील माहिती सामान्य माहितीवर आधारीत आहे, आम्ही याची पुष्टी करत नाही, आमचा उद्देश तुमच्यापर्यंत माहिती पोहोचवण्याचा आहे)