स्पेनमध्ये मंगळवारी रात्री पूर्व भागात प्रचंड पाऊस झाला. हवामान विभागाने दिलेल्या माहितीनुसार, आठ तासांत वर्षभराच्या पावसाची सरासरी नोंद झाली. या भीषण पावसामुळे शहरांमध्ये हाहाकार उडाला असून रस्त्यांवर पाणी साचले आहे.
ड्रोनच्या मदतीने मिळालेल्या फूटेजमध्ये वेलेंसिया भागातील पूल जलप्रवाहात वाहून गेला असल्याचे दिसत आहे. या अनपेक्षित नैसर्गिक आपत्तीत आतापर्यंत 95 जणांचा मृत्यू झाला आहे, तर अनेकजण बेपत्ता आहेत.
स्पेनमध्ये विनाशकारी पावसाचा तडाखा-
स्पेनच्या पूर्वेकडील भागात अचानक झालेल्या मुसळधार पावसामुळे विनाशकारी पूर आला. यामुळे अनेक शहरांमध्ये रस्ते पाण्याखाली गेले असून, वाहने आणि रेल्वे मार्ग बाधित झाले आहेत. पाण्याचा जोर इतका होता की, वेलेंसिया शहरातील एक प्रमुख पूल पूर्णतः नष्ट झाला. या पावसामुळे घरं आणि इतर संरचना मोठ्या प्रमाणात नुकसानग्रस्त झाली आहेत. विशेषत: मॅड्रिड आणि बार्सिलोना येथे बऱ्याच ट्रेन्स रद्द करण्यात आल्या आहेत, आणि इतर आवश्यक सेवा सुद्धा निलंबित झाल्या आहेत.
हवामान विभागाची माहिती-
हवामान विभागाने सांगितले की, वेलेंसिया भागात मंगळवारी आठ तासांत एक वर्षाची सरासरी पाऊस झाला आहे. यामुळे शहरातील सामान्य जीवन विस्कळीत झाले आहे. वीजपुरवठा खंडित झाल्याने अनेक भाग अंधारात गेले आहेत. या आपत्तीमुळे आपत्कालीन यंत्रणांना काम करणे कठीण झाले आहे, मात्र प्रशासन सतर्कतेने परिस्थिती हाताळत आहे.
मदतकार्य आणि पंतप्रधानांचा प्रतिसाद-
स्पेनचे पंतप्रधान पेड्रो सांचेज यांनी आपत्तीग्रस्त भागाची पाहणी करून तातडीने मदतकार्य सुरू केले आहे. पोलिसांनी हेलीकॉप्टरच्या साहाय्याने नागरिकांना सुरक्षित ठिकाणी हलवले आहे. जलप्रवाहात अडकलेल्या वाहनचालकांना पोहचण्यासाठी नौकांचे उपयोग केले जात आहेत. पंतप्रधान सांचेज यांनी म्हटले की, “स्पेनमधील प्रत्येक नागरिक या वेदनेत सहभागी आहे. आपल्या प्रियजनांचा शोध घेणाऱ्यांच्या वेदना आम्ही समजू शतको. परिस्थितीवर मात करण्यासाठी सर्व आवश्यक साधने वापरली जातील.”
सांचेज यांनी सांगितले की, स्पेनमध्ये पूर आणखी काही काळ धोका निर्माण करू शकतो. काही शहरांमध्ये अद्यापही पावसाचा जोर कायम आहे आणि प्रशासन सतत नागरिकांना सतर्क राहण्याचे आवाहन करत आहे.
