किडनीच्या आजाराने त्रस्त असलेल्या मुलाचा रुग्णालयात बेड उपलब्ध न झाल्याने इमर्जन्सी वॉर्डमध्ये तडफडून मृत्यू झाला
उत्तर प्रदेशमध्ये भाजपचे नेते आणि माजी खासदार भैरो प्रसाद मिश्रा यांच्या मुलाचा लखनऊ पीजीआयमध्ये मृत्यू झाला आहे. आजाराने त्रस्त असलेल्या मुलाचा रुग्णालयात बेड उपलब्ध न झाल्याने इमर्जन्सी वॉर्डमध्ये तडफडून मृत्यू झाला.
यानंतर माजी खासदार तेथेच संपावर बसले आहेत. याप्रकरणी आता रुग्णालय व्यवस्थापनाने चौकशीचे आदेश दिले आहेत.
मिळालेल्या माहितीनुसार, प्रकाश मिश्रा हे दीर्घकाळापासून किडनीच्या आजाराने त्रस्त होते, रविवारी अचानक त्यांची प्रकृती बिघडली. त्यामुळे माजी खासदारांनी त्याला पीजीआय रुग्णालयामध्ये नेले. डॉक्टरांना तातडीने दाखल करून उपचार सुरू करण्याची विनंती केली. त्यांनी आपल्या मुलाला स्ट्रेचरवर झोपवले आणि डॉक्टरांना अॅडमिट करण्याची विनंती करत राहिले. त्यांनी दीड तास शर्थीचे प्रयत्न केले, पण त्यांना त्यांच्या मुलाला रुग्णालयात दाखल करता आले नाही. माजी खासदारांनीच रुग्णालय व्यवस्थापनावर निष्काळजीपणाचा आरोप केला. आपत्कालीन स्थितीत बेड उपलब्ध नसल्याच्या कारणावरून आपल्या मुलाला दाखल करण्यात आले नाही, असे सांगितले. रुग्णालयातील डॉक्टरांनी स्पष्ट केले की, रुग्णालयात एकही बेड उपलब्ध नाही. त्यामुळे त्यांच्या मुलाला रुग्णालयात भरती करण्यात आले नाही आणि त्याचा तडफडून मृत्यू झाला. त्यामुळे डॉक्टर आणि माजी खासदार यांच्यात वाद झाला. संतापलेल्या रुग्णालय व्यवस्थापन आणि येथे तैनात असलेल्या डॉक्टरांवर निष्काळजीपणाचा आरोप करत ते रुग्णालयातीलच आपत्कालीन वॉर्डमध्येच संपावर बसले.
यानंतर घटनास्थळी एकच गोंधळ उडाला. घाईघाईत पीजीआयचे संचालक आरके धीमानही घटनास्थळी पोहोचले आणि त्यांनी या प्रकरणाच्या चौकशीचे आदेश दिले. यासाठी एक पथक तयार करण्यात आल्याचे त्यांनी सांगितले. या चौकशी समितीमध्ये पीजीआयचे डॉक्टर संजय राज, डीके पालीवाल आणि आरके सिंह यांचा समावेश करण्यात आला आहे. आज तीन सदस्यीय पथक चौकशी करून अहवाल सादर करणार आहे. या अहवालाच्या आधारे पुढील कारवाई केली जाईल.
